Psalms 115
PESALEM 115
Anôtô mata jali nê wae êsa
1O Apômtau, otoc aêac sa atom, otoc aêacma ŋaê sa atom, otoc taômnêm ŋaê saêtu nêm têmtac gêwiŋ teŋgeŋŋa to nêm biŋ ŋaŋêŋŋa.
2Amboac ondoc lau samuc têtu kênac gebe
“Êsêacnêŋ Anôtô gêmoa ondoc.”
3Aêacnêŋ Anôtô gêmoa undambêgoc,
eŋ gêgôm gêŋ samob, taŋ nê ŋalêlôm taê gêjam naŋ.
4Êsêacnêŋ gwam silber to gold,
naŋ ŋamalac lemeŋ sêgôm.
5Êsêacnêŋ aweŋsuŋ gêc, mago sêsôm biŋ atom.
Mateŋanô gêc, mago sêlic gamêŋ Aleluja. atom.
6Êsêac taŋeŋsuŋ gêc, mago sêŋô biŋ atom.
Lusuŋsuŋ gêc, mago sêŋu gêŋ atom.
7Êsêac lemeŋ gêc, mago sêmoasac gêŋ atom. Eŋkaiŋ gêc, mago sêsêlêŋ atom
ma nêŋ koclabeŋ kêtaŋ atom.
8Lau sêmasaŋ-gêŋ-tauwaga têtôm nêŋ gêŋ tau
ma lau samob, taŋ taêŋ kêka gwam naŋ, amboac tonaŋgeŋ.
9O amac Israelwaga, taêm êka Apômtau.
Eŋ kêtu amacnêm lautuc ma gêjam-sawaga.
10O Aronnê gôlôac, taêm êka Apômtau.
Eŋ kêtu amacnêm lautuc to gêjam-sawaga.
11O amac, taŋ atêc Apômtau naŋ, taêm êka Apômtau.
Eŋ kêtu amacnêm lautuc ma gêjam-sawaga.
12Apômtau taê gêjam aêac, eŋ oc ênam mec aêac.
Eŋ oc ênam mec Israelnêŋ gôlôac ma oc ênam mec Aronnê gôlôac.
13Eŋ oc ênam mec êsêac, taŋ têtêc Apômtau naŋ,
lau sauŋ to lau kapôêŋ.
14Apômtau êkêŋ amac atu taêsam.
Eŋ êkêŋ amac atu taêsam ma nêm gôlôac amboac tonaŋgeŋ.
15Apômtau taŋ kêkêŋ undambê to nom naŋ,
ênam mec amac.
16Undambê kêtu Apômtaunê undambê
ma nom tec eŋ kêkêŋ gêdêŋ ŋamalac.
17Ŋacmatê to êsêac, taŋ sêc sêsêp nêŋ gamêŋ ŋaŋêŋŋa sêja naŋ,
nêŋ teŋ oc êlanem Apômtau atom.
18Mago aêac oc talanem Apômtau
galoc to oc endeŋ tôŋgeŋ.
Aleluja.
Copyright information for
JAE